"Kape at Pag-ibig"

Sa kape, mayroong ang hinahanap lang ay init

Kapag ito'y lumamig, ito'y wala nang lasa,

Nescafé man maski barako pa.

Mayroong ang hanap ay lasa—

kalidad ng buto, pino ng pagkagiling, tagal ng pagkatusta.

Ang iba'y lugar lang ang ninanasa—

mainit, malamig, barako, espreso o americano—

hangga't may upuan at sandalan ayus nang tagpuan.

Hindi naiiba rito ang pag-ibig.

May nahahalina sa lagablab

Ilan nama'y sa lalim ng ugat

Karamiha'y pagkakataon ang hinahanap.

Kape at Pag-ibig— kapwang (may) buto

Kapwang kailangan ng proseso.

Kahit anong lasa o timpla

Basta't dapat hinog

Dahil kung hindi

May pait na hindi dapat,

May labnaw na hindi mawawala

Kahit na ano pang gawing pagsisikap.